Тоа што Министерството за финансии запиша 34 милиони евра во државни хартии од вредност и за враќање доспева 29 милиони евра, сепак е зголемување на јавниот долг за нови 5 милиони евра.
Според дополнителниот заменик министер за финансии, Кире Наумов, станува јасно дека оваа влада ја однела државата и граѓаните во должничко ропство.
– Незаконската еврообврзница од 450 милиони евра за оваа неодговорна власт не е доволна за сервисирање на редовните обврски на буџетот. Место во најмала рака задолжувањата на домашниот пазар на хартии од вредност да се во рамките на износот на долговите што доспеваат за враќање, министерот Миноски продолжи со трупање на нови долгови. Ова ли е приближување на нето домашниот долг на годишно ниво кон 0(нула), како што самиот изјави пред извесен период, реагира Наумов.
Тој укажува дека и новото задолжување е без негова согласност.
– Предупредувам дека ќе ги искористиме сите правни средства што ни стојат на располагање за да го оспориме ваквото незаконско задолжување на товар на граѓаните. Сите задолжувања што оваа Влада и ги прави на Р.Македонија ќе мора да бидат преиспитани посебно во предизборниот период, реагира Наумов.