Претседателот на Европскиот совет, Доналд Туск, кој денеска присуствува на Самитот „Мигрантската рута на Балканот“ во Виена, пред почетокот на состанокот изјави дека „предуслов за решавање на мигрантската криза е тесна соработка на ЕУ со нејзините партнери на Балканот“.
Според челникот на Евросоветот, кој заедно со комесарот за внатрешни работи и миграциски прашања Димитрис Аврамопулос ги претставуваат ЕУ-институциите денеска во Виена, денешните разговори во австриската престолнина се со цел да се постигне договор „како да се подобри ефикасноста на активностите“.
„Ние треба да потврдиме, како политички, така и во пракса, дека западно-балканската рута на нелегална миграција е засекогаш затворена. Ова е причината зошто јас сум среќен што канцеларот на Австрија, Кристијан Керн, презеде иницијатива и го организира овој состанок“, додаде Доналд Туск.
На денешниот Самит во Виена, покрај канцеларот Керн, кој е домаќин, присуствуваат и германската канцеларка Ангела Меркел, премиерите на Унгарија, Виктор Орбан, на Романија, Дачијан Чолош, на Словенија, Миро Церар, Хрватот Тихомир Орешковиќ, Бојко Борисов од Бугарија, како и премиерите на Република Македонија, Србија и Албанија, Емил Димитриев, Александар Вучиќ и Еди Рама, како претставници на не-ЕУ земјите што се наоѓаат на западно-балканската бегалска рута.