Во рамките на три оперативни акции на поширокото подрачје во Босна и Херцеговина, уапсен е претседателот на федерацијата Живко Будимир, под сомневање за корупција. Во тек е претрес и во зградата на Претседателството на БиХ во Сараево, како и во зградата на владата во Мостар.
Будимир е уапсен во неговиот кабинет од страна на припадници на Државната агенција за истрага и заштита (СИПА).
Според полицијата, тој се товари дека примал поткуп за помилување на осуденици, како и за „уште неколку кривични дела“.
Во соопштението на обвинителството на БиХ се наведува дека „целта на овие истражни активности е откривање на коруптивни кривични дела чии сторители се највисоки претставници на Федерацијата на БиХ.“
Станува збор за оперативните акции со кодни имиња „Мемори“, „Патриот“ и „Правда“.
Полицијата спроведува акција и во областа на Широки Бријег, каде се истражуваат компании во сопственост на семејството на заменик-премиерот на Федерацијата БиХ, Јерко Иванковиќ-Лијановиќ.