Јужна Кореја ќе ги повлече своите работници од областа Кесонг, откако од Пјонгјанг го отфрлија барањето за преговори околу индустриската зона, со која управуваат и двете држави, а која е затворена веќе еден месец.
Официјален Сеул изјави во петокот дека е загрижен за своите работници кои немале пристап до храна и медицинска асистенција во фабриката.
Пјонгјанг пак со денешниот негативен одговор го предупреди Сеул дека можни се сериозни последици.
Ниту една од двете држави не објаснала што подразбираат под сериозни последици.
Војната со зборови, ја доведе во прашање иднината на комплексот, кој се наоѓа на територија на Северна Кореја, во која технологијата и знаењето го обезбедуваат менаџери од Јужна Кореја, додека повеќето работници се Севернокорејци.
Северна Кореја во почеток на месецов, на Сеул и Вашингтон им се закани со „света нуклеарна војна“, и им забрани на менаџерите да влегуваат во Кесонг, а подоцна ги повлече севернокорејските работници.