Македонскиот автомобилист победи во првата трка на асфалтот на легендарната италијанска патека, последна во ЕТЦЦ календарот за оваа сезона
Победи во првата трка, не заврши во втората. Иако со дијаметрално спротивен ефект, сепак, македонскиот автомобилист Игор Стефановскки-Иџе не криеше задоволство по настапите на легендарната патека во Имола (долга речиси пет километри), последна станица во европскиот ЕТЦЦ шампионат за оваа сезона.
„Ја забележав првата победа во кариерата во ЕТЦЦ шампионатот. Триумфот дојде како последица на добриот автомобил што го имам на располагање и новиот тим на Леин Рејсинг зад себе. Секако дека сум презадоволен. Успех на оваа патека е остварување на сон“, почна Стефановски со сумирање на впечатоците по викендот на италијанскиот асфалт.
Резултатот што го забележа и му донесе највисоко место на подиумот (стартуваше од вториот ред) беше убедливо најдобар во однос на конкурентите. Единаесетте круга на автодромот „Енцо Фино Ферари“ ги мина за 21:04,586 минути или за пет секунди подобро од Крис Ричард од Чешка и Финецот Аку Пелинен на втората, односно, третата позиција. Зад неговото име стои и времето на најбрзо извозен круг (1:54,422 минути) со просечна брзина од 154,4 км./ч.
Судар во втората трка го исфрли од игра
Второто излегување на патеката на Стефановски заврши неславно за него.Тргна од четвртиот ред меѓутоа колизија со Швајцарецот Клудио Труфер значеше „Еден од возачите во втората трка се удри во мене. Во првиот момент не бев свесен што се случи. Глупава туѓа грешка, за жал, значеше предвремен крај на трката за мене. Автомобилот е доста оштетен, но најважно е што јас сум добар“, истакна Стефановски кој сезоната ја завршува на 10 место со 14 бода колку што собра и Французинот Пјер-Етјен Шамо.
Шампионатот во ЕТЦЦ опфаќа шест трки. Сезоната почна на патеката „Пол Рикар“ во близина на Марсеј, Франција, заврши во Имола, Италија. Во меѓувреме се возеше и на „Словачка ринг“ на 40 километри од Братислава, на Нирнбургринг во Германија, на „Вила Реал“ во Португалија и познатата француска „Мањикур“ која од 1991 година до 2008 година беше и во календарот на Формула 1 натпреварите.