Германскиот филозоф Јирген Хабермас упатил остри критики до ЕУ, до нејзината политика на која и се неопходни „повеќе демократија и поголема солидарност”.
На предавање во Католичкиот Универзитет Левен, Белгија, како што јавува Дојче Веле на македонски, со наслов „Демократија, солидарност и европската криза“, Хабермас говорел дека европската политика се спуштила на ниво на технократија која им се прилагодува на финансиските пазари.
Потребно е, рекол тој, да се развие наднационална демократија, во која и натаму би имало место за националните држави, но кои би морале да предадат дел од својот суверенитет.
-Доколку сакаат да ја сочуваат монетарната унија, повеќе не е доволно да се даваат кредити за да се поправи конкурентноста на презадолжените земји. Тоа не е доволно. За да се задржи монетарната унија тој, потребно е да се создаде политичка унија.
Хабермас оценува дека е неопходна солидарност и кооперативен пристап кој мора да произлезе од заедничката политичка перспектива, барајќи и демократизација на ЕУ и демократска контрола на Европскиот совет.
Според него, неопходно е основање на нов Конвент кој би предложил нов договор за ЕУ, а клучевите за промените во Унијата в раце ги држи германската влада, врз основа на својата економска сила и бројноста на населението, но во ниту еден случај не смее да се впушти во самостоен пат.
Во публиката на предавањето на Хабермас бил и претседателот на Европскиот совет Херман ван Ромпој.