Полскиот Парламент со десничарско мнозинство денеска го отфрли нацрт законот со кој се предвидуваше речиси целосна забрана на абортусот, откако стотици жени организираа масовни протести низ цела земја.
Десничарските и либералните пратеници во Долниот дом на Собранието со 450 места се здружија и гласаа со 352 гласа против нацрт законот.
Комитетот на полскиот Парламент за правосудство и човекови права вчера го отфрли законскиот предлог и го повика мнозинството да го направи истото.
Владејачката десничарска Партија на законите и правдата која има контрола во Парламентот во принцип се изјасни за забрана на абортусот, но нејзините лидери се свесни дека мнозинството граѓани го поддржува постоечкиот закон кој дозволува абортус во одредени случаи, коментираат полските медиуми.
– Партијата се повлекува бидејќи се плаши од големиот број жени кои излегоа на протести, изјави поранешната премиерка и пратеник од либералите Ева Копач по гласањето.
Десетици илјади жени облечени во црно во понеделникот излегоа на протести ширум земјата против преложениот закон за забрана на абортусот, носејќи транспаренти “Владата не е како бременоста- може да се прекине“.
Владејачката партија предложи текст на закон со кој прекинот на бременоста ќе биде дозволен само доколку животот на мајката е во опасност, а максималната казна за лекарите кои ќе извршат абортус се зголемува од две на пет години затвор.
Влијателната Католичка црква во Полска ја одобри иницијативата за овој закон, иако се спротивстави на идејата жените да бидат казнувани со затворски казни.
Законот кој во моментов е на сила, усвоен во 1993 година, забранува секаков прекин на бременост доколку таа не е последица на инцест или силување, доколку не е загрозен животот на мајката или доколку фетусот нема сериозни деформации.
Минатомесечната анкета покажа дека 74 проценти од Полјаците сакаат овој закон да остане на сила.




