Машката ракометна репрезентација на Македонија се собра во Скопје и започна со подготовки за дуелот со Украина на домашен терен (2 ноември, ВИП арена „Борис Трајковски“) во квалификациите за европското првенство во 2018 година. На првиот тренинг се појавија 15 играчи од планираните 21 колку што останаа а ревидираниот список на селекторот Лино Червар. Националниот тим , според најавите, ќе се комплетира утре со доаѓањето на Борко Ристовски и Кире Лазаров од Барселона, на Дејан Манасков од Рајн Некар Левен, на Велко Марковски од ППД Загреб, на Ристо Арнаудовски од австриски Ферлах и на Ацо Јоновски од Бергишер.
„Големите турнири се секогаш цел за Македонија. Така ќе биде и овојпат. По светското првенство првенство во Франција, сега на ред е обезбедување присуство и на европското првенство во Хрватска. Во меѓувреме останавме без Мојсовски и Миркуловски кои беа едни од столбовите на репрезентацијата и оставија трага во неа. Нема да биде лесно. Ќе одиме чекор по чекор. Првиот е Украина, на Чешка ќе мислиме потоа“, нагласи Червар за време на собирот на репрезентативците во СРЦ „Кале“.
Червар и соработниците ја анализираа Украина во меѓувреме. Селекторот предупредува дека се работи за противник што знае да биде незгоден и да создаде проблеми.
„Го покажаа тоа Украинците за време на последниот циклус на квалификации во Словенија. Нема лесно да биде, но можам да кажам, дека сè ќе зависи од нас и нашиот пристап. Сакаме да почнеме со победа, сакаме да покажеме дека можеме, сакам да видам мотивираност и глад за победи. Потценување на противникот ќе нема и не смее да има. Доколку одиграме како што знаеме и можеме, сигурен сум дека победата нема да изостане“, дополни Хрватот на кормилото на Македонија.
Покрај дуелот со Украина, Македонија на 5 ноември ја чека и гостување во Чешка. Во групата е уште и селекцијата на Исланд со која ќе мечевите се закажани во 2017 година.