Како и во последните неколку изборни циклуси, целосно анонимни изборни кандидати со многу слични имиња како кандидатите на опозициската СДСМ се најдоа на изборните листи.
ИПортал објави дел од листата на кандидати предложена од СДПМ на Бранко Јаневски, која иако нема никакви активности, пред секои избори поднесува листи на кандидати со имиња и презимиња исти или слични на носителите на листите од опозицијата.
Во третата изборна единица оваа партија како носител на листа има поставено лице со исто име и презиме како Љупчо Николовски, дополнителниот заменик министер за земјоделство, шумарство и водостопанство, кој исто така е носител на листата во таа изборна единица на опозицијата.
И не само Николовски, гласачите ќе имаат можност да бидат збунети и од други имиња како Стево Продановски и Радмила Шукуроска.
Стево Пендаровски кој е носител на СДСМ во првата изборна единица, ќе се натпреварува со кандидат од СДПМ кој се вика Стево Продановски од Зелениково, додека на Радмила Шеќеринска, која е носител во петтата изборна единица, ќе и се спротивстави Радмила Шукуроска од Прилеп, објави СДК.мк.
Вакви слични имиња кои имаат за цел да ги збунат гласачите, особено повозрасните или оние со послаб вид, се појавуваа на многу од изборните циклуси во минатото.
Медиумите уште во 2008-ма пишуваа за феноменот во кој Рада Шекеровска од оваа партија му одзела дури три мандати на СДСМ заради сличното име со Шеќеринска, во првата, четвртата и петтата изборна единица.
Партијата на Бранко Јаневски и тогаш кандидираше кандидати со исти имиња како Зоран Зашов, кој има исто име и слично презиме со Зоран Заев и Јанис Макрис, кој има слично име со Јани Макрадули, Игор Ивановски, Петре Петров, Марјанчо Наков и други.
Јаневски за провладините портали изјави дека неговата Социјал-демократска партија на Македонија (СДПМ) на предвремените парламентарни избори ќе учествува самостојно, без коалицирање со другите партии.