Венецуела се соочува со една од најтешките природни катастрофи во последните години, откако два силни земјотреси во краток временски интервал го погодија главниот град Каракас и поширокиот регион, оставајќи зад себе десетици загинати, стотици повредени и големи материјални штети.
Двата силни земјотреси го потресоа Каракас во рок од само една минута – првиот со магнитуда од 7,2 степени, а вториот со магнитуда од 7,5 степени според Рихтеровата скала.
Спасувачките екипи интензивно ги пребаруваат урнатините во потрага по преживеани, додека вршителката на должноста претседателка на Венецуела, Делси Родригез, прогласи вонредна состојба и изрази сочувство до семејствата на настраданите.
Според првичните информации, најмалку 32 лица загинале, а околу 700 се повредени, но властите предупредуваат дека бројот на жртви најверојатно ќе расте. Американскиот геолошки завод претходно процени дека постои 44 отсто веројатност бројот на загинати да надмине 10.000 лица и 30 отсто веројатност да има повеќе од 100.000 жртви.
Во главниот град сè уште се слушаат повици за помош од под урнатините, додека голем број згради останаа без електрична енергија, а метро-сообраќајот е целосно запрен. Потресите, кои биле почувствувани и во Богота, Колумбија, погодиле област западно од Каракас во време кога голем број граѓани биле во своите домови поради национален празник.
Соединетите Американски Држави најавија испраќање спасувачки тимови, медицинска и хуманитарна помош. Заменик-државниот секретар за странска помош Џереми Левин изјави дека Стејт департментот веќе работи со партнерите во Венецуела за координација на помошта.
Поддршка и солидарност пристигнаа и од повеќе земји од Латинска Америка. Претседателот на Ел Салвадор, Наиб Букеле, најави испраќање 300 спасувачи и 50 тони опрема и материјали за помош. Помош понудија и Еквадор, Бразил и Мексико.
Американскиот претседател Доналд Трамп порача дека САД се подготвени за брза реакција и дека веќе им дал инструкции на надлежните агенции да се подготват за дејствување.
Венецуела се наоѓа во сеизмички активна област каде што се судираат Карипската и Јужноамериканската тектонска плоча. Според Геолошкиот завод на САД, посилниот од двата земјотреси бил предизвикан од плитко хоризонтално движење на расед во близина на границата меѓу двете плочи. објави Скопје1.мк