Од Основниот суд Скопје еден вечерва со соопштение информираа дека во просториите на судот раководителот на одделот за човечки ресурси Г.С. физички нападнал еден од портпаролите П.К. во присуство на судија од одделот за претходна постапка С.Ј..
Како што наведуваат од Судот, Г.С. прво вербално и се заканил на П.К., а потоа ја турнал од столчето и ја напуштил просторијата. Нападнатата веднаш телефонски го пријавила настанот во МВР при што интервенирала полицијата и случајот е документиран и преземен од инспекторите за насилен криминал при МВР.
Нападнатата поднела кривична пријава за нападот според член 144 ст. 3 „Загрозување на сигурноста“, која понатаму треба да се процесуира од надлежните органи.
Во врска со настанот и од страна на судската управа ке бидат преземени соодветни мерки, се вели во соопштението од Кривичниот суд Скопје, притоа се демантираат како што се наведува “ тенденциозните шпекулации дека во судот имало физички напад при кој имало превртување на бироа и уништување на инвентарот, а во кој настан бил вклучен и претседателот на судот“.
Претходно во текот на денот, повеќе медиуми објавија дека петнаесетмина судии од Основниот суд Скопје 1 упатиле известување до Судскиот совет до Советот за утврдување на факти и покренување на постапка за утврдување одговорност за судија со кое бараат против претседателот на судот Владимир Панчевски да бидат преземени соодветни мерки поради негово постапување „имајќи ја предвид должноста на претседателот на судот да внимава да не се наруши угледот, честа и достоинството на личноста“.
Тие потсетуваат дека Панчевски на веб страницата на Основниот суд Скопје 1 , но и во медиумите јавно објави дека поднесува кривина пријава против судијата Иван Џолев. Тоа е спротивно на член 97 став 3 од Законот за судовите поради што Панчевски треба да сноси одговорност, велат неговите колеги кои се одважија да се потпишат на известувањето до Судскиот совет.