Министерот Никола Тодоров нема да им се извини на лекарите од ГОБ “8 Септември“ кои во петокот ги обвини дека ги лажирале податоците во системот “плаќање по учинок“. Тој изјави дека им верува на инспекторите и на резулатите од контролите кои се точни и прецизни.
-Јас им верувам на инспекторите кои долго време си ја вршат својата работа, ако сакате да се уверите погледнете ги нивните записници изјави денеска Тодоров пред новинарите.
Министерот Тодоров не одговори што покажале дополнителните контроли кои инспекторите ги вршеа во саботата во болницата„ 8 Септември.“ Според лекарите од болницата повторените контроли покажале дека не само што не допишувале бодови, туку и внесувале помалку од сработеното.
Тодоров пак, ги предупреди дека времето за да се коригираат истекува. За два дена повторно ќе влезат контролите и тогаш за сите што не го почитуваат законот ќе следуваат казни, суспендирања и откази од работа. Според него осум здравстените установи во изминатите два дена ги коригирале податоците, односно почнале да внесуваат бодови по реално сработени здравствени услуги.