Со гласање на затворениците, раселените, болните и изнемоштените лица, како и со гласањето во дијаспората стартуваа деветтите по ред парламентарни избори во независна Македонија.
Избирачките места се отвораат во 7:00 часот, а гласањето завршува во 19:00 часот. Во дијаспората тоа ќе се спроведува по локално време.
Во казнено –поправните домови низ земјава право на глас имаат 2.015 лица. Според препораките од Државната изборна комисија ако тие гласачи немаат важечки документ за идентификација (лична карта или пасош), ќе можат да гласаат со домска односно затворска легитимација. На Избирачкиот список се регистрирани и 13 внатрешно раселени лица.
Пријавени за гласање во странство се 20.573 граѓани, додека на посебниот Избирачки список се запишани 230.122 лица кои согласно евиденцијата на надлежен орган се смета дека се на привремена работа во странство.
Своето право на глас во странство државјаните на Република Македонија ќе можат да го остварат во 41 дипломатско-конзуларно претставништво и конзуларни канцеларии. Најмногу пријавени за гласање има во Берн 4.256, во Венеција, 2724, во Детроит 1.170, Њујорк 1.168, Мелбурн 1112… За овие избори за гласањето во Берн отворени се три дополнителни избирачки места, додека во Венеција две. Најмалку пријавени има Мадрид – 10, во Пекинг 13 и во Варшава 14 гласачи.
Дома или на адреса каде што се пријавени денеска гласаат и болните и немоќните. Гласаат и 13 внатрешно раселени лица.
На списокот како посебна бројка се и 325 гласачи, кои се членови и заменици членови на избирачки одбори кои ќе го спроведуваат гласањето во Дипломатско – конзуларните претставништва. Тие веќе гласаа во просториите на Државната изборна комисија, пред да отпатуваат во државите каде ќе гласаат нашинците.
На изборите учествуваат 11 политички субјекти: шест политички партии и пет коалиции со 58 листи со 1092 кандидати.
За неделните деветти парламентарни избори, во Избирачкиот список запишани за гласање се 1.784.416 државјани на Република Македонија. Во Македонија ќе гласаат 1.531.368 граѓани.
Изборите ќе се спроведуваат на 3.480 избирачки места во шест изборни единици во Македонија и во 46 во седмата изборна единица што ја опфаќа дијаспората.