Хорот Распеани Скопјани ќе настапи на фестивалот ”Вси в ен глас” (All as one), кој ќе се одржи на 6 и 7 јуни во Љубљана во центарот за култура ” Шпански борци”. Се работи за фестивал на самоорганизирани хорови од поранешните југословенски простори.
Освен Распеани Скопјани, на фестивалот ќе учествуваат: Лезбор (Хрватска), Хоркестар (Србија), Проба ин Светоназори (Словенија) и женскиот хор Комбинат кој е и домаќин на фестивалот. ”Вси в ен глас”, кој се одржува по втор пат. Првото издание беше пред две години во Белград.
По повод гостувањето на Распеани Скопјани, во интервјуто за словенечкиот фестивал, прв пат јавно раскажуваат за искуството да се биде дел од Распеани Скопјани, за тоа дека ги сметаат за антидржавен елемент, дека никогаш нема да се согласат со лудилото на Скопје 2014
www.vsivenglas.si
Порака:
Во Скопје, Македонија се случува нешто за кои самите ние немаме изговор, извинување, ниту пак некакво објаснување. Се вика Скопје 2014 и не е само архитектонски зафат. Во Скопје се разбудени многу лоши духови, поларизиран е етерот и разнишани темелите на кои почива една социјална држава. Всушност, има многу објаснувања, а за некои од нив пееме. Сакаме и нашата страна од приказната да биде присутна, сакаме да покажеме дека овде има и такви кои не се согласуваат со ова лудило. Ние сакаме да раскажеме дека се гордееме на Скопје како град на солидарноста и ги паметиме сите кои придонеке скопјани да го живеат тој идеал. Молкот не е злато и затоа пееме!
Како го составувате репертоарот?
Секоја песна е предлог на некој од хорот, а предлогот содржи и други детаљи како – причина да се пее, локација, пораки кои сакаме да ги испратиме – било што за контекстот на артикулирање политичка мисла преку хорски перформанс. Дискусијата и носењето одлука некогаш трае со недели, а некогаш само неколку мејла. Најчесто по предлог на некој од членовите. Хорот повеќе постои преку бескрајните преписки, дискусии и средби отколку преку пеењето. Хорот и неговиот репертоар се само една форма во која функционираат членовите. Репертоарот на Распеани Скопјани претставува перформативен коментар на секојдневието во Скопје, Македонија и светот.
Каде и за кого најчесто пеете?
Пееме на улица, за се што сметаме дека е доволно релевантно или барем смешно да искоментираме. Пееме за себе, за оние кои не сакаат да слушаат кога зборуваме, пееме за Марко Кабранов.
Како реагират публиката и јавноста на вас?
Луѓето го сакаат пеењето, перформансот, хуморот, тагата, а пеењето во група е дополнително шармантно само по себе. Делувањето преку аматерски самоорганизиран хор има некое само-еманципирачко својство, те прави да се чувствуваш како да си земал/а назад нешто насилно одземено, нешто што ти припаѓа. За нас делува како да сме земале некое посебно парче слобода, па сакаме да веруваме дека поради истото ги добиваме иљадниците позитивни коментари и пораки.
Нашата работа и некои од нашите перформанси досега биле и предмет на социјални истражувања, уметнички колаборации и теоретско-дискурзивни коментари од страна на истакнати имиња од критичката теорија.
Дали сте доживеале некакви непријатни искуства поради вашиот ангажман од страна на вашите противници или од власта?)
Па не се само рефлектори и автограми 🙂 Ретко, но се случува дофрлување на улица, непримерни коментари под видеата на youtube, а еднаш потпретседателот на владата на македонија го нарече нашиот хор „анти-државен елемент“ и „дел од словенското сценарио на опозицијата да ја отфрли оваа власт“ 🙂