Движењето „За чист воздух“ преку онлајн петиција бара владата да ги открие деталите и причините за загаденоста на воздухот во Скопје. Во петицијата се вели дека состојбата со нечистиот воздух во нашата држава, од ден на ден станува сѐ поалармантна, а партиите си тераат политички кампањи и се борат за власт, додека граѓаните тивко умираат.
Во текстот на петицијата која досега ја потпишале 3.041 лица пишува дека петицијата е одговор на игнорантскиот став кон воздухот кој го дишат граѓаните на Македонија.
„Вашите приоритети не треба да бидат политичките кампањи и начинот на кој треба да дојдете на власт. Ако нѐ нема нас граѓаните ја губите и поддршката во сите сфери од Вашето функционирање“, наведено е во петицијата.
Од движењето велат дека секој ден сме сведоци на сѐ поголем број болни деца од респираторни болести, а смртните случаи не се исклучок. Но властите како да имаат поголеми приоритети од тоа да им обезбедат здрав живот на своите сограѓани и на нивните деца.
„Постојаноста на сериозното загадување на воздухот и отворените јавни повици да се преземе нешто не вроди со плод. Затоа ние граѓаните, ние кои си го сакаме животот и сакаме да дишеме чист воздух, ја создадовме оваа петиција како последна шанса за нас и за нашите деца, со цел да ја извојуваме институционалната битка за почист воздух, да создадеме поквалитетен живот и да ја намалиме смртноста од аерозагадувањето. Апелираме до Владата, да се откријат деталите за причините за загадувањето, со констатација дека Министерството за животна средина и просторно планирање се уште нема излезено со веродостојни податоци околу причинителите на аерозагадувањето. Без овие информации ветувањата од страна на властите дека проблемот ќе биде решен најверојатно нема да ја доживеат својата реализација. Ве молиме преземете ги потребните мерки додека не е доцна. Секоја минута е важна“, пишува во петицијата.