Минатата ноќ се одржа 74.издание на Златен Глобус, еден од најпрестижните филмски настани, но она што ја разбрани јавноста е говорот на жената која најмногу пати била номинирана за Оскар, и го освоила три пати – Мерил Стрип.
Стрип на синоќешната манифестација беше почестена за нејзиното значително делување, а таа пак го искористи широкиот аудиториум да го критикува новоизбраниот претседател Доналд Трамп.
Во својот говор, Стрип ја критикуваше реториката на Трамп за време на кампањата како и тоа што во една прилика Трамп се исмеваше на новинар со попреченост.
– Еден настап годинава ме запрепасти. Ги закопа сидрата во моето срце. Не бидејќи беше многу убав, впрочем ништо убаво немаше во него но беше ефективен настап и си ја заврши работата. Тоа беше моментот кога личноста која бараше да седне на најпочитуваната фотелја во нашата земја, имитираше репортер со попреченост, личност која ја одминал и во привилегиите, во моќта и во капацитетот да се одбрани, рече Стрип во нејзиниот говор.
Се работи за настапот на Доналд Трамп во ноември 2015 година кога го имитираше новинарот на Њујорк Тајмс, Серџ Ковалески. Трамп отсекогаш негирал дека го направил тоа.
Но Мерил Стрип не застана овде. Таа во својот говор се осврна и дека културата на Америка е да ги прифати странците.
– Холивуд е полн со аутсајдери и странци и ако ги избркаме нема да имаме ништо освен фудбал и ММА (мешовити боречки вештини), кои не се уметност, порача таа, дополнувајќи дека не можела да прифати што во реалниот живот некој бил толку понижен од моќна личност.
– Кога моќните ќе ја злоупотребат својата положба, сите ние губиме, порача Стрип, чии говор наиде на огромен аплауз.
Таа ги повика медиумите постојано да го следат Доналд Трамп, да известуваат и да го повикаат на одговорност по секој негов испад.
Актерката која во јавноста важи за една од најпочитуваните актерки на својата генерација повика на поддршка за Комитетот за заштита на новинарите бидејќи како што вели „тие ќе ни требаат за да се движиме напред и за дознавање за вистината“.
И веднаш по нејзиниот говор се огласи новоизбраниот претседател.
– Никогаш не сум се потсмевал никому. Луѓето велат тоа било мојата идеја, како да Мерил Стрип и останатите можат да ми ги читаат мислите. Не направив такво нешто, порача Трамп, според кој Мерил Стрип е само огромна љубителка на Хилари Клинтон и затоа го критикувала.