Синдикатот на македонската дипломатска служба (СМДС), во отворено писмо до, како што истакнуваат, в.д. министерот за надворешни работи Илија Исајловски бараат објаснување како Никола Попоски кој е избран за пратеник и му е верифициран пратеничкиот мандат, се уште ја извршува функцијата МНР иако според нив со денот на верификација на мандатот пратеник, нему по сила на законот, посебно членовите 63 од Уставот, потоа 5 и 9 од Законот за пратеници, како и 8 од Изборниот законик, му престанува функцијата заменик- премиер и министер за надворешни работи.
Од Извршниот одбор на овој Синдикат велат дека на ова се поттикнати „посебно по последното интервју на пратеникот Попоски за еден италијански весник, а според медиумските јавувања на некои македонски пропагандни центри тоа било дадено средината на овој месец во просториите на кабинетот на Министерот за надворешни работи на Република Македонија.
– Извесно е дека не се работи за ниту теориска можност за примена на членот 93 од Уставот, бидејќи во Владата на која и престанал мандатот има нејзини членови кои не станале пратеници, па оттука не може да стане збор дека постои каква и да е неопходност оние членови на таквата Влада кои станале пратеници – да продолжат да ги држат своите претходни функции заради опасност од дисфункционализација. Таков е случајот и со Министерството за надворешни работи, со оглед на тоа што заменикот МНР во какви и да е услови на спреченост на МНР – исцело ги има ингеренциите да ја врши функцијата МНР. Следствено, се’ што по 30 декември 2016 година презел пратеникот Попоски претставувајќи се како МНР е лажно претставување, па дури треба и да се разгледа евентуалната кривична одговорност.
Имајќи го предвид жалното незнаење на правната регулатива на некои македонски медиуми, единствено какво- такво оправдување може да биде фактот дека како на сајтот на Владата, но, што многу поважно, така и на сајтот на МНР се уште фигурира пратеникот Попоски како МНР. Не само што во неговиот профил не е назначено дека веќе не е МНР туку е пратеник, туку и се уште се објавуваат вести за негови активности како МНР. Само како илустрација – неговата посета на Зимскиот камп „Снежна Македонија 2017“ и тоа од 03 – 08 овој месец, се вели во писмото од Синдикатот.
Според Извршниот одбор на овој Синдикат, „извесно е дека последните интервјуа на пратеникот Попоски се дадени од позиција на партиски функционер и, евентуално, пратеник, меѓутоа, во нив фигурира дека е тој актуелен заменик- премиер и МНР. Следствено, изјавите што се таму содржани непосредно или посредно се ставови и на ова Министерство, а за што веќе реагиравме и претходно (Соопштение за јавноста од 02.06.2016 година) при што се оградивме од таквите изјави, практично некои од нив сега повторени, и каде објаснивме зошто истите се недопустиви за еден министер за надворешни работи. Уште повеќе, што едно од тие интервјуа е дадено за неодамна регистриран странски медиум и тоа од личност која наводно има одлежано затворска казна заради говор на омраза. Апсурдните изјави дека сме како Шведска, Финска или Данска дури и не заслужуваат да ги коментираме“.
Врз основа на ова, од Синдикатот на на македонската дипломатска служба бараат од Исајловски
– најитно објаснување врз основа на што, ако е тоа точно, му е дозволено на пратеникот Попоски да го користи кабинетот на МНР во Министерството и зошто не се реагира со појаснувања до јавноста дека пратеникот Попоски веќе не е МНР;
– најитно да се корегираат сите оние дезинформации на сајтот на ова Министерство каде пратеникот Попоски фигурира како МНР; и
– најитно отворање на ова прашање на седница на Владата (доколку се држат) поради тоа што се работи за противправност видлива кај редица други поранешни министри, а сега пратеници, вклучувајќи го и последниот премиер.