-Денеска, како што бевте сведоци, се случи една катарза и врв на срамот во правосудството во Македонија. Златко Биковски, кој го водеше случајот Пуч, дојде да го заменува Владимир Милошевски. Владимир Милошевски констатиравме, не е надлежен и нема надлежност да застапува вакво обвинение. Истиот тој Златко Биковски на претходното рочиште потврди дека тој има право да го застапува ваквото обвинение. Само по себе, ова претставува апсурд и контрадикторност, што само по себе го разобличува и го отвора како пупка сето она што се случува во македонското правосудство, изјави лидерот на СДСМ, Зоран Заев откако рочиштето за предметот Поткуп беше одложено за 23 февруари, во очекување на одговорот од ЈО за организиран криминал на барањето на неговата одбрана за изземање на Биковски.
Во текот на денот, судот даде пауза од два часа откако одбраната на лидерот на СДСМ Зоран Заев, побара изземање на обвинителот Биковски, кој пак дојде да го замени претходниот обвинител Владимир Милошевски, кому му е истечен мандатот.
Одбраната на Заев бараше изземање на Биковски поради тоа што според неа тој е дел од „злосторничко здружување“ и од политички причини сака да му наштети на Заев како шеф на опозицијата. Исто така Биковски бил и дел од обвинителите во случајот Пуќ, што СЈО го повлече.
Претседателот на СДСМ Зоран Заев, според обвинителниот акт, се товари за барање и примање поткуп од струмичкиот бизнисмен Иван Николов Сачевалиев, за градба на државно земјиште.