Поранешната министерка за внатрешни работи, Гордана Јанкуловска денеска беше повикана на распит во Специјалното јавно обвинителство. Јанкуловска не откри за кој случај била во СЈО, но за медиумите изјави дека e разговорите биле за веќе отворена истрага против неа.
„За кој случај бев повикана мислам дека е коректно да ви каже тој што ве повикал овде, бидејќи јас како правник доследно го читам законот и тоа дека постапките се тајни. Очигледно некој го чита поинаку законот и со оглед на тоа што ве повикале овде мислам дека треба да бидат коректни тие да ви соопштат за кој предмет и која беше причината што ме викнале. Доколку добиев овластување од надлежниот обвинител да презентирам со задоволство ќе ви презентирав“, рече Јанкуловска.
Таа обвини дека СЈО одамна го загуби кредибилитетот да води било какви постапки поврзани со правото, како и дека тие станале алатка на СДСМ употребувана за нивни цели.
„При разрешувањето на политичката криза на Зоран Заев му е потребна помош и тука е СЈО да излезе со нешто што оди во прилог на опозицијата и очигледно е дека ги подобруваат позициите на Заев“, изјави Јанкуловска.
Иако СЈО го обвини за политичка пресметка со неа, таа кажа дека сепак дошла во обвинителството бидејќи тоа претставува државна институција.
Јанкуловска е осомничена во предметите „Тврдина“ за уништувањето на опремата за прислушување, потоа во „Титаник“ за манипулации во изборите и последниот „Тенк“ за набавка на скапиот мерцедес за кој опозицијата обвини дека чинел 600 илјади евра и бил наменет за екс премиерот Никола Груевски. Таа се најде и меѓу лицата кои претседателот Ѓорѓе Иванов неуспешно се обиде да ги аболира во контроверзната објава за аболиција на осомничените во истрагите на СЈО, која по протестите и реакциите во јавноста беше повлечена.