Конкурсот за барокен Градски трговски центар е извитоперено толкување на законските прописи, а архитектот Жарко Чаушевски не постапил етички и професионално кога прифатил да направи идејно решение за Трговскиот во квази барок стил и треба да му се одземе лиценцата да работи како архитект – ова се поентите од средбата на Асоцијацијата на архитектите на Македонија по прифаќањето на решението Трговски центар да се вклопи во Скопје 2014.
Претседателката на ААМ, Даница Павловска вели за НОВА дека архитекти – членови на асоцијацијата, но и уметници и граѓани ќе организираат протести и ќе се потпишува петиција против барокен Трговски.
„Неаналитичен ненаучен и крајно нетранспарентен е начинот на кој се одлучи за ваква промена на Трговскиот центар. Ова е бесрамно однесување на Владата“, вели Павловска
По два неуспешни конкурси, раководството на Градскиот трговски центар, во трет обид избера идејно решение за доградба и реконструкција на фасадата на објектот.
Жири – комисијата се одлучи да го избере делото на Жарко Чаушевски и Филип Богатинов, автори кои и досега учествуваа во изработката на архитектонски трудови од владиниот проект за целосно менување на изгледот на метрополата.
Комплексот со доградбата ќе добие три куполи и десетици антички столбови, а на последниот спрат ќе има голема тераса со бројни скулптури.
Раководството на ГТЦ доби одобрение за ваквата доградба со измена на маркичката во ДУП „Мал Ринг“ од страна на општина Центар.