Потпишување на петиција против менување на изгледот на Градскиот трговски центар на 14 јуни и организирање на протестен собир истиот ден во 19 часот- oва е договорено вчера од страна на Асоцијацијата на архитекти на Македонија (ААМ).
Во акцијата на ААМ „Го сакам ГТЦ“, се повикува стручната јавност и граѓаните со жив штит да застанат во одбрана на ГТЦ од обидот за негово обезличување.
ААМ во наредниот период планира да иницира и научен симпозиум во врска со континуираното нарушување на препознатливиот изглед на центарот на Скопје, но и поради прекршувањето на загарантираните права на архитектите врз сопствените дела.
Архитектонската фела се одлучи да поднесе барање до Комората на овластени архитекти и инженери на Р.М. за одземање на овластувањата за проектирање на архитектите Жарко Чаушевски и Филип Богатинов, чие идејно решение победи на распишаниот конкурс од страна на раководството на ГТЦ.
Од ААМ оставаат простор до сите граѓани и организации да се вклучат во протестниот собир со креативни и остварливи предлози.
Автор на ГТЦ е еден од великаните македонската архитектура, сега починатиот, Проф. Живко Поповски.