По реобјавувањето на текстот на НОВАТВ “ Кои се Македонците со сметки и фирми во Панама “објавен на 03.04.2016 година, нашата редакција доби писмен демант од компанијата АД Адинг. Во текстот на НОВАТВ во 2014 година е објавено дека тројца раководни лица од оваа компанија имаат свои фирми во Панама. Во истиот текст постои и писмена изјава на адвокатот на компанијата. НОВАТВ не објавила дека АД Адинг има врски со Панама, туку нејзините раководни лица, иако демантот се однесува на компанијата. НОВАТВ во време на објавувањето на текстот бараше да разговара со раководните лица лично или нивните адвокати, а не со адвокатот на компанијата бидејќи и ние тргнавме од фактите кои со Панама ги поврзуваа раководните лица, а не самата компанија, но оттаму не препратија кај адвокатот на компанијата којшто во 2014 го изјави следново:
„АД Адинг беше единствената компанија од која НОВА доби коментар за фирмите. Иако сакавме да разговараме со директорите лично, сепак, компанијата не препрати кај нивниот адвокат Весна Гогова.
-Јас не можам да зборувам за тоа што прават директорите во приватниот живот и каде се отвораат фирми. Можам единствено да проверам дали Адинг има некакви трансакции со оваа фирма, рече Гогова, а ние се уште чекаме да ни одговори дали ја завршила проверката.“ стои во текстот.
Во прилог ја пренесуваме и реакцијата која, пак, е насловена како демант од компанијата испратена завчера или две години по оригиналниот текст.
„Со вчерашно реобјавување на информацијата за регистрирана фирма во Панама на лица од АДИНГ АД Скопје, Ви го доставуваме следното соопштение од компанијата :
- Со најголема одговорност према јавноста, према акционерите и према деловните партнери како во Македонија така и во повеќе од 15 земји во светот каде што АДИНГ е присутен со своите македонски производи,најодоговорно тврдиме дека Компанијата АДИНГ АД Скопје нема никакви деловни или други односи со наведената фирма од Панама.
- Истовремено потенцираме дека имињата и идентитетот на раководните лица се злоупотребени за нечии цели и интереси, во моментов за нас од непознати причини.
Дополнително, во написите се инволвира и АДИНГ што претставува потенцијален ризикза намалување на угледот на домашниот и меѓународниот пазар, па поради истото ќе бидеме принудени да ги превземеме сите законски дејствија заради откривање на мотивите и целите, како и заштита на личниот интегритет на инволвираните лица и на нашата компанија.