По реакциите на МАНУ дека лустрацијата на познатиот македонски писател Славко Јаневски всушност е напад на македонскиот културен идентитет, претседателот на Kомисијата за верификација на фактите, Томе Аџиев, во интервју за „Дневник“ ја отвора дилемата за тоа кој со прст посочил и дал констатација дека одреденото лице што е наведено во решенијата на Комисијата е Славко Јаневски.
Дали навистина академиците „чепкаат“ во македонскиот идентитет со тоа што се ставаат во заштитата на жртвите од соработниците на тајните служби, кои исто така биле поети и писатели и кои можеби се и од поголем калибар во македонската култура, вели Аџиев.
Според него, академиците сами излегле со име и презиме на писателот, со што ја довеле во прашање неговата репутација.
– Не знам како ние можеме да задираме во темелите на македонскиот идентитет кога во решението за кое МАНУ излезе со реакција нема име и презиме на тој на кого се однесува, ниту која била професијата на тоа лице, какво било неговото значење, колку бил успешен и слично. Тие самите излегоа со име и презиме на писателот и ја доведоа во прашање неговата репутација. Сите решенија на Kомисијата гласат дека одредено лице Н.Н., односно лице со одреден псевдоним, било соработник на службите за државна безбедност. Ние не констатираме друго, не даваме епитети. Од друга страна, дали тие самите не задираат во македонскиот идентитет со тоа што не се ставаат во заштитата на жртвите од таквата соработка, кои исто така биле поети и писатели и кои можеби се и од поголем калибар во македонската култура, или, ако ништо друго, се повеќе по број од соработникот? Зошто МАНУ не застана во одбрана на лицата што биле предмет на шиканирање, кодошење, на клеветење? Имаше критики и за правните аспекти на одлуката, односно дали е издржана?
– Прво, не би донеле таква одлука да немаше докази. Документите врз чија основа е донесена одлуката се во Aрхивата на Kомисијата, а се извлечени од Државниот архив на Република Македонија. Ако некој се сомнева, може да дојде и да провери. Уверен сум дека тие што сега ја коментираат одлуката со соопштенија да ги видеа документите, не ќе излегуваа со вакви коментари и реакции, вели Аџиев.