Група од околу 200 граѓани денеска во 17 часот се собра пред Мајчин дом во скопската населба Аеродром, откако вчера беше почната изградбата на осумкатница. Граѓаните го блокираа булеварот „Јане Сандански“ и се обидоа да ги турнат тарабите со кои е оградена парцелата.
„На сила се ставени, на сила ќе ги турнеме“ извикуваа граѓаните кои ја туркаа оградата, која ја штитеше полицијата и приватно обезбедување на инвеститорот.
Граѓаните се организираа спонтано преку социјалните мрежи, а поддршка на протестот дадоа и граѓанските иницијативи „Сакаме Аеродром да дише“, „Во одбрана на Дебар маало“ и „Скопје смог аларм“.
https://www.facebook.com/NovatvWeb/videos/518005151960484/
„Го изгласавме Златко Марин да биде градоначалник токму поради ветувањето дека нема да се гради на оваа парцела“ – е најчестиот коментар од граѓаните кои се борат за заштита на зеленилото во општината.
Граѓанската иницијатива „Сакаме Аеродром да дише“ бара Златко Марин да се повлече од функцијата градоначалник на Општина Аеродром, бидејќи не го исполнил ветувањето кое им го дал на Аеродромци.
Марин денеска преку прес конференција уште еднаш се изјасни дека е против изградба на осумкатница на парцелата кај Мајчин дом, но дека е немоќен да направи било што за тоа да го спречи, и вината ја префрли кај поранешната власт.
-Мојот став за ова прашање е непроменет. Зграда пред Мајчин дом не треба да има. Фактите се дека претходното раководство на Општината предводено од ВМРО-ДПМНЕ го донесе овој ДУП без најава и без дебата. Ние направивме ревизија, а пред Уставниот суд се доставени 13 претставки по однос на ДУП-оти. Аеродром до судот ги достави и сите потребни документи, но до денеска нема одлука, Уставен суд ниту го стави ДУП-от во мирување, ниту го поништи, изјави Марин и рече дека го поддржува протестот.
На зеленилото пред Мајчин дом ќе гради фирмата ЗСФ ком, сопственост на Фатмир Етеми, поранешен пратеник од ПДП НДП, која на лицитација преку приватна банка го презеде градежното земјиште, а според поднесениот проект ги доби сите правни одобрувања за градба од општината во времето на Ивица Коневски.