Деновиве се навршува точно една година откако опозицијата ги објави сомнежите дека 3,5 милиони евра од парите за изградба на автопатот Демир Капија – Смоквица биле извадени во кеш од ангажираната градежна компанија „Актор“ и завршиле во нечии приватни џебови.
За најнови детали околу случајот „Актор“ се обративме до Управата за финансиско разузнавање, меѓутоа директорот на оваа институција Владимир Атанасовски и понатаму е недостапен, а од неговиот кабинет само нѐ препратија во Јавното обвинителство. Таму се интересиравме дали по една година Обвинителството отворило истрага за овој случај, меѓутоа денеска не добивме одговор.
Неофицијално, обвинителите сѐ уште прибирале податоци за финансиското работење на фирмата.
„Актор“ беше избрана на тендер да ја гради делницата од Демир Капија до гевгелиското село Смоквица долга 28,2 километри. На трасата ќе се изградат шест моста, меѓу кои и најдолгиот во Македонија, два километарски тунела и сето тоа за нешто повеќе од 270 милиони евра.
СДСМ тврдеше дека во период од околу една година (од 2013 до 2014), секој месец меѓу први и десети со автобус во Македонија влегувале грчки државјани и се упатувале во Неготино во тамошната филијала на Стопанска Банка. Оттаму ваделе пари кои им ги префрлала „Актор“ по основ на хонорар, а сомнежот на опозицската партија беше дека никој од нив не бил ангажиран да работи на автопатот.
Наводно Грците веднаш штом ги ваделе денарите ги менувале во евра во истата банка и таму ѝ ги предавале на сметководителката на „Актор“, Атина Зиога. Потоа заминувале од Македонија без кешот. Портпаролот на СДСМ, Петре Шилегов тврдеше дека дури 96 лица учествувале во ланецот и дека некои од нив повеќе пати ја повториле целата процедура за да на крајот извадат 3,5 милиони евра.
Факт е дека службениците во Стопанска банка од Неготино пријавиле во Управата за финансиско разузнавање оти преку нивната банка поминуваат сериозно високи трансакции во кеш, а тоа впрочем им е и законска обврска. Управата, која е задолжена да спречува перење пари, отворила предмет за овој случај на 11 ноември 2013, меѓутоа од списоците коишто јавно ги подели СДСМ се забележува дека тоа не ги спречило Грците и понатаму да вадат кеш од „Актор“.
Откако Управата отворила предмет трансакциите продолжиле, па така во наредниот период биле извадени 1,2 милиони евра од оние вкупно 3,5 милиони.
Автобуските прошетки од Грција до Неготино добиваат поинаква тежина ако се земат в предвид и останатите сомнежи поврзани со целиот проект.
Прво дискутабилна беше цената за изградба на автопатот која изнесуваше околу 9 милиони евра по километар, а Шилегов неколку пати повтори дека италијанска фирма имала дури за 40 милиони евра пониска понуда за автопатот но сепак не победила на тендерот. Тој ја проблематизираше и точноста на понуда на „Актор“. Проектот „Демир – Капија – Смоквица“ чини вкупно 271 милион евра од кои 13 се наменети за фирма која ќе врши надзор над работата. Тогаш за самата реализација на автопатот остануваат 258 милиони, а понудата на „Актор“ изнесувала 257.
По објавувањето на аферата јавниот обвинител Марко Зврлевски изјави дека во овој случај степенот на сомнеж е на најниско ниво и затоа не треба да се стопира изградбата на автопатот за евентуално да не се зголеми штетата.
Европската банка за обнова и развој (ЕБОР), која учествува како кредитор во проектот, тогаш немаше коментар за скандалот, а до ден денеска не се јави ниту посочената сметководителка од „Актор“, Атина Зиога.