Двегодишна истрага на спортски новинар по потекло од Африка под псевдонимот Анас предизвика потрес во фудбалскиот свет, откако се објавени снимки од над 100 судии и официјални лица кои земале мито пред натпреварите.
Би Би Си веќе објави дел од документарецот. Но она што предизвика уште поголемо внимание во јавноста е што се јавува дека во следните денови ќе биде објавен делот посветен на митото и корупцијата меѓу судиите кои ќе ја делат правдата на претстојниот Мундијал што започнува неделава.
Во тој серијал според најавите ќе може да се види како повеќе познати судии се фатени на дело како примаат мито. Освен судиите, на снимките наводно се и челници на ФИФА, како и челници на некои фудбалски клубови. Меѓу нив е и претседателот на фудбалскиот сојуз на Гвинеја, кој зема сума од 60.000 долари.
На снимките наводно е и судијата Ранге Марва од Кенија, кој се наоѓа на списокот помошни судии на Мундијалот, кој е снимен како прима мито во износ од 600 долари, како и судијата од Гамбија, Ебрима Џало кој е исто така е на списокот на судии на Светското првенство.