Со 8 гласа „за“ и 5 гласа „против“ Судски совет го избра судијата Африм Фидани за претседател на Врховен суд, а претседателката на судот до февруари годинава, Беса Адеми која конкурираше за повторен мандат доби 2 гласа „за“ и 11гласа „против“.
Судијата Фидани е судија во Врховниот суд од 2017 година. Известителката Тања Чачарова-Илиевска се изјасни дека е против двајцата кандидати кои беа во трка за позицијата претседател на Врховен суд.
Мнозинството на колегите, одлучија да му дадат поддршка на вториот кандидат. Му честитам и искрено би сакала да ме демантира во мојот став, не заради друго туку заради единствена цел-тоа би било добро за македонското судство и граѓаните. – Тања Чачарова-Илиевска член на Судски совет на РСМ.
Додека пак членката Весна Дамева со свој спротивен став.
Стекнав впечаток дека двајцата кандидати не се добри врз основа на спроведено интервју. Не можам да се согласам колеги, тоа се долгогодишни судии коишто имаат свои одредени ставови по одредени состојби. Начинот на кој ќе го презентираат можеби нас не ни се допаѓа затоа што и ние како носители на јавни функции не секогаш го кажуваме она што сакаме да го кажеме и се воздржуваме. Весна Дамева член на Судски совет на РСМ.
Според Ивица Николовски, членот на Советот во врска со кандидатката Беса Адеми кажа дека изминатите години во нејзиниот ангажман не видел одреден предлог, заедничка расправа или изнаоѓање рационални решенија за поефикасно судство, додека пак за вториот кандидат Африм Фидани, Николовски посочи дека треба да биде познат во развој на правната мисла, а не преку изборот да биде познат како претседател на Врховен суд.
Јас колешката Беса ја доживеав како натпревар помеѓу овие два органи, кој е Врховниот суд, а кој е Судскиот совет, а кои се резултатите? Јас лично сметам дека овој натпревар не даде придонес. Не можам да гласам за судија кој треба да биде претседател на Врховен суд, а во овој дел во развојот на правната мисла, во развојот на стратегиите никаде не е присутен. – Ивица Николовски член на Судски совет на РСМ.
Претседателот на Кривичен суд Скопје, пак, Иван Џолев е избран за судија на скопска Апелација. Судски совет ги избра и судијките Марија Клетничка Марковска и Оља Ристова како и судијата Бетим Јахја за постапување во кривичната област во Апелација, а судијата Хаџо Тариќ е избран за претседател на Основен суд Крушево.