Агенцијата за кредитен рејтинг Фич објави дека претседателот на САД Доналд Трамп претставува ризик за глобалната економија, со напомена дека неговиот „агресивен тон“ и подготвеноста да воведува „непредвидливи промени“ во американската политика можат да наштетат на светскиот раст и да го поскапат задолжувањето на државите, пренесува агенцијата АП.
-Администрацијата на Трамп претставува ризик за меѓународната економска политика и за глобалните суверени кредитни рејтинзи. Предвидливоста на американската политика е намалена, при што востановените меѓународни комуникациски канали и правила односите се ставени на страна што пак ја зголемува можноста за неочекувани промени во американската политика со потенцијални глобални импликации, се вели во соопштението од Фич.
Ако се суди според првите недели од владеењето на Трамп, неговата администрација би можела да ја поремети и надворешната трговија, да го намали протокот на капитал, да ја ограничи миграцијата и да иницира конфронтирачки полемики кои би можеле да ги дестабилизираат финансиските пазари, констатира агенцијата.
Фич понатаму констатира дека останатите ветени мерки на Трамп како намалување на данокот, намалување на прописите и поголеми инфраструктурни потрошувачки би можеле да го поттикнат растот во САД.
Сепак во коментарот на агенцијата се предупредува на можноста со овие мерки на Трамп да бидат загрозени други светски економии бидејќи тој се залага за повторни преговори за постоечките трговски договори.