„Не сакаме акробатски игри, не сакаме театар, туку нудиме стандарди во полза на Македонија и на сите граѓани“, рече претседателот на ДУИ, Али Ахмети на новогодишниот прием на партијата. Го повтори ставот на ДУИ за консензуален кандидат за претседател.
– Во полза на сите граѓани- консензуален кандидат кој ќе ги претставува со достоинство сите граѓани на Република Македонија без разлика на која етничка заедница и припаѓаат, изјави лидерот на ДУИ.
Првиот човек во ДУИ рече дека партијата во 2014 година ќе продолжи да се залага за интеграција на земјата во Европската унија и во НАТО.
Ги наброја посетите и средбите со странските лидери во изминатата година притоа истакнувајќи дека ДУИ не направила ништо спротивно на програмата на партијата, ниту пак направила конспиративни политики на штета државата.
„Во минатата година имавме средби во Виена, Вапингтон, Берлин, Осло, Брисел и многу други центри. Нашите барања се легитимни. Побаравме помош да се забрза патот на земјата кон НАТО и он Европската унија. Да ја оствариме целта, Македонија да го добие заслуженото место во клубот на западните земји“, истакна Ахмети.
За 5 јуни го најави конгресот на партијата, кога ќе треба да биде усвоена идната програма на ДУИ за наредните четири години.
Ахмети рече дека партијата на локалните избори доби потврда за својата политика, освојувајќи најголем број градоначалнички места во градовите на потегот од Куманово до Струга. За оваа победа се заблагодари на печалбарите кои дојдоа и гласаа на изборите, а нивниот глас беше пресуден и за победата во Кичево.