ДУИ и албанците нема да дозволат да паднат жртва на било какви монтирани материали.Ова го истакнала лидерот на Демократската унија за интеграција Али Ахмети на денешната средба со Директорот на Директоратот за проширување на ЕУ Кристијан Даниелсон.
Ахмети истакнал дека со протечените снимки за високи функционери од ДУИ кои се однесуваат наприфатниот живот на политичарите е цел на одредени центри, во соработка со криминални групи, кои се обидуваат да поттикнат ирационални постапки на ДУИ со цел да го оштетат процесот на спроведување на Договорот од Пржино.
Ахмети и Даниелсон разговарале и за актуелната ситуација во земјата, безбедносната ситуација, спроведувањето на договорот во Скопје, за интеграцијата во Европската Унија, реформите и меѓуетничките односи.
Ахмети истакнал дека Државната Изборна Комисија треба да ја заврши својата работа навреме додека ДУИ ќе даде поддршка на ДИК за примерно спроведување на изборите.
Даниелсон денеска во Скопје ќе оствари средба со лидерите на четирите политички партии, потписнички на Договорот од Пржино и со премиерот Емил Димитриев.
Во Брисел вчера Даниелсон имаше средба и со македонскиот министер за надворешни работи Никола Попоски, кој по средбата изјави дека станало збор за актуелната политичка состојба во земјата и за процесот на организирање и подготовка на предвремените парламентарни избори во Македонија закажани за 5 јуни.
Даниелсон доаѓа во Македонија пред најавеното распуштање на Парламентот, а денеска пратениците ги изгласаа и н новите министри во Владата предложени од ДУИ.