Демократската унија за интеграции денеска во Гостивар ги претстави кандидатите за градоначалници за 23 општини и носителите на листите за членови на советите во 31 општина.
За нив, Али Ахмети, лидерот на ДУИ рече дека ги красат морални вредности и оти имаат капацитет да ги реализраат програмите и ветеното.
Пред почетокот на конвенцијата во спортската сала „Младост“, Ахмети најнапред им се обрати на насобраните симпатизери и членови на партијата од бина која поставена пред салата.
Во своеото обраќање, тој рече дека откако ДУИ е формирана, Албанците во Македонија оствариле многу права.
– Не е патриотизам да се даваат помпезни изјави, патриотизам е да работиш посветено и да ги спроведеш идеите на Хасан Приштина и Скендербег, рече Ахмети и апелираше до присутните да не наседнуваат на провокации и да придонесат за одржување фер избори и да се искаже волјата без страв.
Освен лидерот на ДУИ, на конвенцијата се обратија и кандидатите за градончалници на општините Гостивар, Невзат Бејта, на Тетово, Теута Арифи, на Кичево, Фатмир Деари, на Чаир, Изет Меџити, на Дебар, Руджди Љата, на Струга Арбен Лабуништа и Липково, Садула Дураку.