Доколку во рок од две недели, Владата, министерствата за правда и администрација, не седнат да преговараат со Синдикатот околу Законот за судска служба, тогаш ќе следуваат уште масовни протести, порача денеска судската администрација на протест.
Над 1.000 судски службеници од повеќе градови низ земјата, точно напладне започнаа со протест пред Собранието на Република Македонија, а оттаму кон ресорните министерства и Владата. На власта и порачаа да научи да го слуша гласот на незадоволната администрација, а на министрите дека лошите закони ќе им се срушат како кула од карти.
– Министерке еве и денеска сме тука, ќе одвоите ли малку време да објасните зошто 5 проценти од вкупниот број на вработени во администрацијата мора да бидат казнети? Зошто со една оценка 1 се губи работно место? Зошто можноста за напредување во кариерата е непостоечка? Зошто се укина степенот на кариера и не се цени трудот на работниците?, рече Трпе Дејановски, координатор на штрајкувачкиот одбор при синдикатот на УПОЗ пред вратите на Министерството за администрација.
Лидерот на Синдикатот на вработените во управата, правосудните органи и здруженија на граѓани (УПОЗ) Пеце Грујовски, пред Владата порача дека власта треба да покаже доблест и да отпочне преговори со синдикалните претставници.
– Едно можам да ви ветам, дека овие закони за административни службеници, за судски службенции итн., ќе паднат еден ден како кула од карти затоа што се неприменливи. И министрите и Владата знаат дека овие закони не чинат, ама не сакаат да си го признаат поразот. Дали ќе биде доблест ако кажат на барање на Синдикатот влегуваме во преговори? Ќе ви се срони ли бисерот? Зошто не игнорирате? Доколку во рок од две недели не добиеме повратен одговор, тогаш следуваат следните постапки со сите синдикати кои не поддржуваат, рече Грујовски пред Владата.
Денешниот двочасовен протестен марш беше мирен, а УПОЗ доби поддршка и од и од потписниците на „Повелбата за солидарност“, односно од Самостојниот синдикат на новинари и медиумските работници ССНМ, Синдикатот на македонската дипломатска служба, Конфедерацијата на синдикални организации КСОМ, Левичарското движење „Солидарност“, Мултиетничкиот синдикат на образование МЕСО, Синдикатот на културните работници на Македонија и партијатаЛевица.
Сите порачаа дека власта мора да научи да го почитува туѓото мислење, бидејќи во спротивно оваа пролет ќе се соочи со силно синдикално здружување.
На денешниот протест му претходат два целодневни штрајкови во судовите, кои службениците ги започнаа од средата.
Синдикатот на УПОЗ и Здружението на судска администрација го активираа штрајкот откако ги прогласија за неуспешни преговорите со Министерството за правда околу измените на Законот за судска служба. Преговорите почнаа како резултат на предупредувачкиот штрајк што беше одржан на 3 декември 2015 година.