САД никогаш не биле поблиску до вооружен конфликт со Венецуела, пишува американскиот портал „Аксиос“. Целосно опремена флота од седум воени бродови и најмалку една подморница е распоредена пред брегот на земјата, додека за претседателот Николас Мадуро е понудена награда од 50 милиони долари.
Официјално, целта на американската мисија е борбата против трговијата со дрога. Сепак, Белата куќа отворено го третира Мадуро како „бегалец и шеф на нарко-картел“, а не како легитимен лидер. Во операцијата учествуваат и 2.200 маринци – единици кои обично се користат за амфибиски операции, што дополнително ги засилува шпекулациите за пошироки воени намери.
Високи американски функционери дури не ја исклучуваат можноста за сценарио слично на интервенцијата во Панама во 1989 година, кога беше соборен диктаторот Мануел Нориега.
Ако Мадуро падне, никој нема да плаче, изјави еден советник на претседателот Доналд Трамп.
Мадуро возврати дека САД подготвуваат „воен терористички напад“ и ги повика граѓаните да се приклучат на милицијата. Поддршка доби и од колумбискиот претседател Густаво Петро, кој ги отфрли тврдењата за „нарко-картелот“ и распореди дополнителни трупи долж границата.
Според руски медиуми, вистинската цел на Вашингтон е контрола врз венецуелските нафтени резерви – најголеми во светот. Во меѓувреме, државниот секретар Марко Рубио, сметан за главен архитект на политиката кон Каракас, изјави дека ова е „прва фаза од чистењето на хемисферата“.
Иако отворена инвазија засега изгледа малку веројатна, американските власти не ја исклучуваат. Можно е да следуваат воздушни напади врз производни центри за кокаин, пресретнување на бродови или дури таргетирање на самиот Мадуро со беспилотни летала.