Иницијативата „Го сакам ГТЦ“ продолжува под мотото „Во новата година со стариот ГТЦ“, кампања која според граѓанскиот активист Никола Писарев треба да им докаже на приватните инвеститори дека мора да постои граница на капиталот и зачувување на интересот на граѓаните.
Меѓу првите кои ја поддржуваат кампањата и Иницијативата „Го сакам ГТЦ“ е Асоцијацијата на архитекти, а претседателката Сања Раѓеновиќ Јовановиќ вели дека секогаш ќе стојат во одбрана на автентичноста на објектот.
– ГТЦ остана како симбол на борбата против се она што му се случува на нашиот град. Архитектите, сигурно дека мора да понесат дел од одговорноста и ако успееме да го спасиме ГТЦ ќе се спасиме и себе како професија, изјави таа.
Од друга страна, активистот Писарев потенцираше дека околината на ГТЦ се граѓаните а во овој случај никако не смеат да бидат исклучени во прашањето за менувањето на објектот.
– Цела оваа кампања што ја правиме цел месец декември и големата протесна забава на 28 декември со мотото „Во новата година со стариот ГТЦ“ треба да им покаже и на приватните инвеститори дека мора да постои граница на приватниот капитал и граница каде што мора да се зачува интересот на граѓаните, а токму тоа е ГТЦ и целата иницијатива е за зачувување на еден објект кој што е премногу важен за Скопје. Многу луѓе го препознаваат ГТЦ како срцето на градот, кое што во моментов, како и целиот град е во прединфрактна состојба, а ние имаме одговорност кон идните генерации да им го предадеме овој објект ваков отворен и убав, изјави Никола Писарев.
Првата средба на волонтери кои ќе се вклучат во Иницијативата ќе се одржи веќе утре во Мобилната Галерија во Паркот на Франкофонијата од 18 часот, а од 10-11 овој месец, на влезот во ГТЦ ќе биде поставен штанд за разговор со граѓаните и собирање потписи против „уништувањето на ГТЦ“.
Кампањата на активистите и Иницијативата ќе го заокружи „барањето за спас на ГТЦ“ со протестна новогодишна забава која ќе се случи на 28 декември.