Невладини организации за заштита на животните реагираат дека се злоупотребени од компанијата Тинекс во интерес на кампањата за кандидатот за градоначалник на општина Центар, Владимир Тодоровиќ.
Радмила Пановска од организацијата “Срна” вели дека се шокирала кога вчера утрото ја видела печатената реклама на компанијата “Тинекс” во која тие тврдат дека на нејзината организација и на зружението „Срце за животните“ минатата година им дале донација од 5, 5 милиони денари, а годинава 400.000 денари или, ако се заедно околу 90 илјади евра.
Освен овие тврдења, Пановска го прочитала и своето име во рекламниот материјал каде таа дава и изјава каде ги фали и се заблагодарува за хуманите активности на компанијата која помогнала да се згрижат и нахранат животните. Таа тврди дека таква изјава не дала никогаш, а уште помалку земала донација од компанијата.
Таа, како претставник на “Срна” и претставници на другата организација која се споменува “Срце на животните” тврдат дека никогаш не примиле пари од нив, ниту давале изјави за нивните реклами. Се што добиле од Тинекс минатата година, велат тие, е донација од стариот леб со поминат рок кој компанијата се согласила да им до дава за да ги нахранат животните.
“Ми се јавија од Тинекс да ме прашаат дали ќе потврдам дека ни помагаат преку донации со стар леб со поминат рок и јас нормално, реков дека потврдувам, иако не знаев за каква цел тоа ќе биде употребено.
– Во последните 4 години до Тинекс имавме поднесено молби за донации за прехрамбени производи со поминат рок со кои нашите активисти ќе ги хранат бездомните кучиња. На нашите активисти им се носеше на одредени локации само леб и лиснати теста со поминат рок, за што сме им многу благодарни.
– Но, да се напише лага дека 5.5 милиони се дадени без да наведат за што се потрошени и дека не се дадени во пари туку во производи со поминат рок не е никаква хуманост и помош на заедницата како што е напишано во рекламата, туку најголема измама и срам за кандидатот за градоначалник што во својата кампања сака да се покаже дека е голем хуманист, а всушност се служи со највалкани лаги и измами и јавноста ја доведува во заблуда дека на друштвата се донираат големи пари“, тврди Радмила Пановска од организацијата “Срна”.
Oд компанијата “Тинекс” велат дека е точно дека донацијата била во храна, а не во пари, но негираат дека Пановска не им дала изјава.
“Ние им даваме леб, а вредноста на таа храна е толку, ние не лажеме, имаме документи и не ни е јасно зошто тоа го зборуваат. Ние во секое време можеме тоа да го докажеме, таман работа да се служиме со вакви работи” велат од компанијата “Тинекс” иако не објаснија зошто во рекламата не прецизирано дека донацијата е во леб, а не во пари.
Дополнително, Тинекс до редакцијата на Нова го достави и договорот за донација кој го има со организацијата “Срце за животните”. Членот во договорот кој ја определува сумата за донација вели “Давателот на донацијата му дава на примателот материјални добра – храна во износ ДО 6 милиони денари”. Претседателот на таа организација, Вангел Мицевски во разговор со Нова вели дека таков договор имаат потпишано, но тие добивале само стар леб, а и самиот договор, вели тој, ја има додавката ДО, што не значи дека тие ги примиле тие 6 милиони денари во стар леб.