Привремено затворање на американските амбасади во повеќе исламски земји е резултат на снимен разговор меѓу шефот на Ал Каеда, Ал Завахири и регионалниот раководител во Јемен, јавуваат медиумите во САД.
САД донеле одлука за времено затворање на амбасадите на Блискиот Исток и на северот на Африка, откако пресретнале порака на лидерот на Ал Kаеда, Ајман ал Завахири, во која тој наредил на припадниците на оваа терористичка мрежа да извршат напад во Јемен, објави
„Њујорк тајмс“.
Според Тајмс, кој се повикува на американски претставници, пресретната е комуникација меѓу Завахири, кој го наследи Бин Ладен на чело на Ал Каеда и лидерот на јеменскиот огранок на организацијата, Насер ал Вухаиши. Весникот додава дека на барање на безбедносните власти на САД, првично не е објавен идентитетот на лидерот на Ал Каеда чии разговори се откриени. Планирано било нешто „крупно“, известува Си-Би-Ес.
Американскиот Стејт департмент одлучи вчера да го продолжи траењето на мерката за затворање на своите дипломатски претставништва на Блискиот Исток до 10 август, поради информации дека би можел да уследи терористички напад на Ал Каеда. Поради опасност од напади, амбасадите во Јемен ги затворија и Франција, Германија и Велика Британија.