Тирана: Податоците за населението на работоспособна возраст (15–64 години) во Албанија, во периодот од 2010 до 2025 година, покажуваат силен тренд на опаѓање, особено во последните години, зголемувајќи ја загриженоста за пазарот на трудот во земјата и економските перспективи.
Од 2010 до 2019 година, населението на работоспособна возраст е релативно стабилно, помеѓу 1,94 и 1,98 милиони жители. Иако имаше демографски движења и емиграција, влијанието врз вкупниот број на населението на работоспособна возраст не беше толку драматично. Помеѓу 2023 и 2024 година, населението на работоспособна возраст од 1.864.062 лица се намали на 1.542.389, што претставува намалување од повеќе од 320 илјади луѓе за една година, или околу 17 отсто, наведува весникот „Монитор“.
Според истиот извор, официјалните податоци за периодот 2015–2025 година покажуваат значително намалување на населението во сите активни возрасни групи, со особено изразен пад кај младите луѓе кои штотуку влегуваат на пазарот на трудот.
„Возрасната група со најсилно намалување е групата од 20 до 24 години, со околу 48% помеѓу 2015 и 2025 година. Лицата на возраст од 15 до 29 години се најпогодени од емиграцијата и намалувањето на наталитетот. Падот кај оваа група е многу алармантен и укажува на непосреден недостиг на млада работна сила во земјата“, стои во анализата на весникот.
Значителен пад се забележува и кај возрасната група од 45 до 54 години, што сигнализира недостиг на среднорочна стабилност на работната сила, пад бележи и возрасната група од 55-59 години, додека, возрасната група од 60-64 години се зголемува, поради постарата структура на населението.