Лидерот на левичарската коалиција – победник на парламентарните избори на 23 јуни, Еди Рама, денес го доби мандатот за состав на новата влада на Албанија.
Кабинетот на неговиот иден владин кабинет ќе брои 20 члена.
Согласно албанскиот Устав, претседателот на државата му го доделува мандатот за формирање влада на лидерот на партијата што има најмногу пратенички места во Парламентот.
Албанскиот Парламент денес треба да избере свој претседател и потпретседатели. Нов претседател на Парламентот треба да биде Илир Мета, лидер на помалиот партнер на социјалистите, Социјалистичкото движење за интеграција (МСИ).
Според изјавите на Рама, новата влада ќе работи за побрзо приближување на Албанија кон ЕУ.
„Новото мнозинство ќе работи за приближување на земјата кон Европа. Тоа е исклучително важен момент. Не треба да дозволиме возот за Европа да се оддалечи од нас, туку треба да го стигнеме што е можно побрзо и да влеземе во нова етапа на евроинтеграциите“, истакна Рама.
Во 140-члениот албански Парламент, коалицијата на Рама освои 83 пратенички места, додека досегашната владејачка Демократската партија н премиерот Сали Бериша имаат 57 мандати.
Албанците се надеваат дека до крајот на годинава ќе го добијат кандидатскиот статус за членство во ЕУ откако Брисел во два наврати не се согласи за таков статус на нашиот западен сосед.