Али Ахмети смета дека на Македонија може да и се случи украинско сценарио, ако не се деблокира евроинтеграцискиот процес. Во неговото годишно обраќање Ахмети рече дека Украина и не е толку далеку, а тамошните етнички и идеолошки несогласувања тој ги спореди со околностите во Македонија, јавува телевизијата Алсат-М.

“Членството во НАТО не само што продуцира добри меѓуетнички односи, туку и добри меѓу соседски односи во целиот западен Балкан, бидејќи Украина не е далеку и во секое време треба да се потсетиме што се се случи во Украина. Несакани и невкусни за никого. Досега има околу 5 илјади убиени лица“, рече Али Ахмети, претседател на ДУИ.

Лидерот на ДУИ ја повика опозицијата да се врати во Собранието, порачувајќи дека политичката борба не е добро да се води надвор од институциите на државата.

„Сакаме опозицијата предводена од СДСМ со своите мандати да се врати во парламентот, како што тоа го стори опозицијата во Албанија. Решението не го гледаме е во одземање на нивните пратенички мандати, зашто враќањето на пратениците во Собранието на Македонија го отвора патот на дијалогот, и продолжување на дебатите. Не еднаш кажав, дека за своите добри идеи за државата, тие имаат добар партнер во ДУИ и ќе ја имаат нашата поддршката“.

Ахмети рече исто така дека во Македонија не треба да има повеќе од две албански партии. “Организирањето на Албанците во само една партија е штетно, но е штетно и да се организира трета албанска партија, бидејќи се парчосува гласот на Албанците. Треба да имаме силни мандати, тоа е важно прашање за работата во институциите, како што е важно да имаме организирана и конструктивна опозиција.“

Ахмети говореше и за отворените прашања со ДПМНЕ, признавајќи дека постојат многу несогласувања, бидејќи коалицијата е продукт на волјата на двата народи на Македонија. И покрај неуспешната идеја за консензуален претседател, Али Ахмети инсистира дека одлучувањето со консензус треба да стане политичка пракса.