Галеријата на икони во Музејот на Македонија, каде што се чува културно наследство на земјава, над три месеци е во катастрофална состојба. Од она што може да се види внатре, икони кои датираат од почетокот на 14.век, се чуваат во несоодветни услови а допрва ќе се проценува штетата за нив.
Како што посочија министерот за култура, Роберт Алоѓозовски и в.д директорот на Музејот на Македонија, Гордан Николов, целиот музеј е запоставен од претходната власт, која најавувала луксузни градби во доменот на културата, додека во исто време не се грижеле за оваа национална установа.
– Оштетувањата во просторијата на Галеријата на икони на Музејот на Македонија, направени на 09.03.2017 со паѓање на таванскиот дел и несоодветното реагирање во временски рок од повеќе од три месеци од страна на раководството е скандал од невидени размери, потенцираше Алоѓозовски.
Иконите во оваа галерија, која е единствена од ваков вид е прогласена за културно наследство и има особено значење.
Со цел да се санираат штетите, Алоѓозовски и Николов формирале тим составен со луѓе од Музејот, Националниот конзерваторски центар и Градскиот конзерваторски центар, кои во најскор можен период од една недела треба да утврдат за колкава штета се работи и колку средства ќе бидат потребни за да се зачуваат како иконите така и галеријата.
За тоа време, Николов информираше дека иконите ќе бидат преместени во просторија во која се прилагодуваат условите, а која е во сопственост на Министерството за одбрана.
– Воедно Министерството за култура ќе изврши ревизија на состојбата на музејските збирки и условите во кои тие се чуваат и ќе изработи приоритетна листа за санација на штетите предизвикани од претходната власт, дополни Алоѓозовски на заедничката прес конференција со луѓе од конзерваторските центри и в.д директорот на Музеј на Македонија.
На прашањето на НОВА, за да се направи компарација, колкав би бил износот доколку се утврди дека иконите кои беа потпрени и легнати на под, биле оштетени, една од конзерваторките присутни на прес-конференцијата одговори дека околу 120-те икони немаат цена бидејќи се културно наследство и за нив може да се зборува само во милионски суми, но систем за вреднување на овие дела не постои за да се даде прецизна бројка.