Актуелниот претседател на ВМРО-Народна Партија Љубчо Георгиевски е инвеститор на планираниот нов хотел во барок под Кале- со ваква информација излезе телевизијата Алсат-М, обелоденувајќи детали за фирмата ХМ Инвест Груп која победи на аукцијата за добивање на парцелата под Кале. Оваа фирма понуди по 44 евра за еден метар квадратен.
Според документите од Централниот регистар, фирмата купувач ГМ Инвест Груп од Струмица е во целосна сопственост на друга струмичка компанија- АМГ ЕДИЛХА.
ЕДИЛХА пак, според тековната состојба, е компанија основана и во сопственост на физичко лице од с. Секирник, Босилово, но има и содружник- фирмата ВИП Проект од Скопје, пишува телевизијата.
Компанијата од главниот град, патем поседува две третини од вкупниот влог во ЕДИЛХА, а и на нејзината интернет страна се вели дека струмичката е нивна фирма-ќерка.
Сопственик на ВИП Проект пак, е физичкото лице Љубчо Георгиевски, чиј матичен број кореспондира со денот, месецот, годината и местото на раѓање на поранешниот премиер, пишува Алсат.
АЛСАТ М уште завчера побарала изјава од фирмата која победи на јавното наддавање, а вчера побарале изјава и од Љубчо Георгиевски за планираната инвестиција, но се уште Георгиевски не се појавува во јавноста.
Георгиевски е поранешен премиер, од 1998 – 2002та година, по што се повлече од лидерската позиција, а партијата му ја препушти на Груевски. Во целиот изминат период тој силно ги критикуваше политиките на ВМРО-ДПМНЕ и во политиката и во економијата, тврдејќи дека Македонија ќе остане изолирана на балканот. Георгиевски извесно време беше и во коалиција со својот некогашен лут конкурент Бранко Црвенковски.