„Ќе ги искористиме сите граѓански легални форми, па ако треба ќе собираме и потписи за референдум за да ги одбраниме правата на граѓаните и да ги оствариме нашите барања“, порачаа активистите на граѓанската иницијатива АМАН вечерва на прес конференција, откако Собранието денеска го прогласи за невалиден нивниот предлог на закон за измени на Законот за енергетика.
Тие се едногласни да не се откажат од она што го бараа со измените на Законот за енергетика, враќање на евтината дневна струја и да не се плаќаат услугите кои граѓаните не ги користат од енергетските компании.
А ќе ги активираат и останатите барања со кои го почнаа протестот пред шест месеци.
– Сите легални граѓански форми на реагирање се во опција, па ако треба ќе собираме и потписи за референдум, иако знаеме колку тешко се реализираат таквите активности поради притисоците, какви што имавме за време на собирањето и на овие 10.000 протписи. Но,не се плашиме и нема да подлегнеме на притисоци и закани – рече Петрит Сарачини, активист на АМАН.
Граѓанската иницијатива е расположена да одговори и на изразената подготвеност од страна на Регулаторната комисија за енергетика и државните институции за разговор со нив.
– Ќе ги држиме за збор и ќе бараме да го остварат кажаното во врска со ангажираната моќност, а кажаа дека 33 проценти можат да бидат намалени за домаќинствата – рече Сарачини.
Од АМАН јавно предложија струјата произведена во домашните производни капацитети да се користи за домаќинствата.
– Не убедуваа дека онаа струја што ја произведува ЕЛЕМ е за 2,5 пати поевтина од увезената, па тогаш предлагаме таа да им се испорачува на домаќинствата, а индустриските капацитети кои создаваат профит нека купуваат од странство, такви се и директивите на европската енергетска заедница на која се повикуваат државните институции – подвлече Сарачини.
Активистите на граѓанската иницијатива АМАН се изненадени од односот на пратениците кон нивната претставничка за време на расправата во Собранието, кога беше навредувана и омаловажувана.