Без прочистен избирачки список, без решено прашање за медиумите и одвојување на партијата од државата нема услови за фер и демократски избори во земјава. Ваква порака вчера упати германската амбасадорка Кристине Алтхаузер, објави Алсат-м.
Таа вели дека сите овие обврски се клучни за земјава да ги надмине пречките кон кредибилни избори. А токму тоа ќе биде и можност сите партии да добијат еднакви и фер можности.
„Никој не знае дали навистина ќе има избори на 5 јуни. Изборите не означуваат крај на еден процес, туку се само еден од многуте чекори кои земјата треба да ги преземе за да ја поврати својата евроатланска перспектива. Договорот од Пржино е се уште жив, тој е активен, некои делови од него се веќе спроведени, но за некои се уште се преговара“, рече Кристине Алтхаузер – амбасадор на Германија во Македонија.
Инаку, германската амбасадорка уште еднаш ја потенцира и важноста на препораките од Извештајот на Прибе. Според неа која било влада и да дојде ќе мора да ги спроведе итните реформи кои се бараат и од експертискиот извештај, но и од Европската комисија.
Лидерот на ВМРО-ДПМНЕ вели дека тој не сака да ја коментира изјавата на амбасадорката, туку тој има обврска да ја почитува единствено одлуката на парламентот, а тоа е изборите да се одржат на 5 – ти јуни.
„Парламентот донесе одлука изборите да бидат на 5 – ти јуни и ние сме целосно подготвени за да излеземе на избори на 5 – ти јуни. Наша работа како политичка партија е да ја следиме одлуката на Парламентот“, рече претседателот на ВМРО-ДПМНЕ, Никола Груевски.