Само за пет години, бројот на блокирани граѓани и фирми се зголеми за 77. 000.
Анализата на што ја направи порталот Порталб покажува дека од 2010 година, бројот на блокирани граѓани е зголемен за повеќе од 63. 000 новоблокирани, а кај фирмите листата се зголемила за нови 13. 500.
Според аналитичарите, овие податоци укажуваат дека финансиската состојба и на населението и на бизнисот се влошува. Според дел од економистите, од десет, девет кредити на граѓаните се за преживување, односно задолжувања за да се задоволат основните животни потреби.
На крајот од 2015 година, вкупно 121. 547 граѓани и фирми имале блокирани сметки. Ова значи дека речиси секоја втора фирма се соочила со блокада, а растечки тренд е регистиран и кај населението. Така, на крајот од декември под блокада биле 77. 005 граѓани и 44. 542 фирми.
Во пакет со пораст на долговите на стопанството и на граѓаните, експертите посочуваат дека растат и долговите на државата.
– Многу пари влегоа во земјава, но сметам дека Македонија сериозно оди во голема сиромаштија и сметам дека ако сега драматично нешто не промениме, по четири години, без разлика која политичка гарнитура да дојде, па и волшебник да дојде, состојбата ќе биде тешка, вели за Порталб аналитичарот Зоран Витанов.
Во должничкиот круг се и дел од јавните претпријатија. Токму дел од јавните претпријатија се најдоа на “црната листа на должници“ што ја објави УЈП, со долгови по различни основи кон државата. Меѓу нив се Македонски шуми, Макоедонија пат и јавниот сервис МРТ.
Во последното истражување што го објави “Бизинсинсајдер“ Македонија е во групата на 15 земји со најдлабок индекс на мизерија.