Според вицепремиерот за економски прашања, Кочо Анѓушев, Македонија е исклучително нерамномерно регионално развиена.
„Само 18 отсто од населението е покриено со канализациска мрежа, а во Скопје има споменици од милиони евра. Ваквата ситуација мора да ја промениме и можностите со кои располагаме да ги распределиме подеднакво насекаде“, порача денеска тој на трибина за рамномерен регионален и локален развој.
Владиниот претставник потенцираше дека буџетските средства најпрво треба да се распоредат по региони.
„Ние сме мала, но не и богата држава. Затоа треба да размислуваме како семејство, домаќински, и прво да се погрижиме за егзистенцијалните проблеми, патиштата, канализациите, училиштата, болниците, а потоа да се луксузираме“, изјави Анѓушев.
Воедно вицепремиерот рече дека потребна е стратегија за обезбедување на услови за подобар живот не само во Скопје туку насекаде низ Македонија.
„Ако тоа не го направиме, ќе продолжи тенденцијата сите да сакаат да живеат во главниот град штго е неиздржливо“, предупреди Анѓушев.