Официјален резултат нема. Има еден резултат направен врз база на флуоресценција, но според сите меѓународни протоколи, тој не е во целост релевантен, велат професори од ветерина.
Здружението за заштита на правата на животните Анима Мунди остро реагира на тврдењата на надлежните дека се јавило беснило кај мачките и прашуваат како е можно за само два дена да се утврди постоење на беснило. Бараат од Факултетот за Ветеринарна медицина, Ветеринарниот Институт, Агенцијата за храна и ветеринарство да излезат јавно и да ги демантираат произволните тврдења.
-Алармираме да запрат шпекулациите во јавноста дека во населбата Радишани е откриено беснило кај две мачки, информација која што во целост е непроверена и пласирана во јавноста без претходно да се изнесе документ за дијагноза на беснило.
Во Македонија нема референтна лабораторија која што може да го потврди ова, а ААПЖ располага со тврдења дека досега не е откриен ниту еден случај на беснило! Сите тие испитувања се вршат во Лондон, односно таму е лоцирана лабораторијата каде што се вади крв, серум и се праќа примерокот. Тоа е процедура за која е потребно време, па оттаму нејасно е кога нашите надлежни институции за само два дена утврдиле постоење на беснило?!
-По ваквите информации што се проширија во јавноста, кај населението само се создава страв и паника, без никаков доказ дека всушност постои беснило. Ако досега животните беа подложни на малтретирања, труења и пукања, со овие непроверени информации, ваквите девијантни појави би се зголемиле уште повеќе!, пишува во соопштението
Анима Мунди обвинуваат дека зад целиот овој случај можно е да стојат поинакви интереси.
-Не сакаме ни да помислиме дека целата оваа паника се прави со цел да се „исчистат“ сите улични животни во Македонија, на крајно нехуман начин и преку користење лаги и шпекулации.
Нова се обиде да стапи во контакт со вработените во ветеринарниот институт. Патологот рече дека нема коментар, а за се што не интересира да го бараме надлежниот раководител.
– Досега официјален резултат нема. Има еден резултат направен врз база на флуоресценција, но според сите меѓународни протоколи, тој не е во целост релевантен. Се што можам да кажам е дека мора да се почекаат официјалните резултати пред да се излезе со конечен став, изави професорот од Ветеринарниот инситут Игор Есмеров.