– Здружението „Анима Мунди“ е исклучително загрижено од неофицијалните информации кои доаѓаат од граѓани и наши активисти дека смртта на жирафата Орка во скопската зоолошка градина не е причинета од вродена срцева мана, туку од невнимание на вработените. Според непотврдените информации жирафата била оставена без надзор со другите жирафи кои веќе се донесени во скопската зоолошка градина и кои и го скршиле рбетниот столб. Особено не загрижуваат информациите дека животното се мачело 20-тина часови пред да угине, се вели во реакцијата на здружението.
Повикувајќи се на изјавата дадена за НОВА, во која портпаролот на зоолошката Дане Кузмановски, посочи дека во последните мигови се направени ренгенски снимки на карлицата на Орка, од здружението велат дека за нив тоа е индикација дека веројатноста е голема гореспоменатото да е точно, и во однос на видео-надзорот кој го напомена Кузмановски, бараат снимките да им бидат доставени, со што би ги проследиле и побарале мислење од нивни стручни соработници во Македонија и во странство.
>> ЗОО Скопје: Не е во ред со смртта на Орка да се оспорува се што сме направиле
Понатаму во реакцијата стои опис за природата на жирафите:
Каква е природата на жирафите?
– Машките жирафи ретко се спријателуваат меѓусебе. Иако се воглавно кротки животни, во природата на мажјаците жирафи е да се тепаат, понекогаш и до смрт, за да се види кој е водачот. Под такви околности, послабиот бега, или умира. Во однос на Орка, тој и да сакал, немал каде да избега, зошто е во заробеништво.
„Анима Мунди“ бара официјална потврда од актуелната директорка на ЗОО Скопје, Татјана Стаменов да се спроведи и независна истрага за смртта на жирафата која предизвика внимание и на домашните но и на странските медиуми, и доколку се покаже дека се точни нивните информации дека жирафата угинала поради невнимание на персоналот очекуваат санкции за одговорните.