Владејачката ВМРО-ДПМНЕ и најголемата опозициона партија СДСМ денеска не дојдоа до конечен договор околу Анкетната комисија за црниот понеделник, а доколку се усогласат ставовите, утре ќе излезат со заедничка изјава, изјавија за НОВА извори вклучени во преговорите.
Во текот на денешниот ден сепак СДСМ излезе со предлог за претседател на Анкетната комисија – да биде Лилјана Ингилизова, кој ВМРО-ДПМНЕ го прифатила, но под услов одлуките да се носат со консензус, што дополнително ги отежнило преговорите.
Според правилата, после усогласување на ставот за претседател на Комисијата, претставниците, односно генералните секретари на владејачката ВМРО-ДПМНЕ и најголемата опозициона партија треба да одат на средба кај претседателот Иванов.
Како што веќе објави НОВА од Брисел, Македонија влегува во временски теснец. Крајно време е да се направи Анкетната комисија за црниот понеделник од 24 декември 2012 година но и да се реализираат точките од политичкиот договор постигнат на почетокот на март при претпоследната посета на европскиот комесар за проширување Штефан Филе.
Во спротивно, нереализирањето на овој договор може сосема да го замрзне напредокот на земјата на европски план.
“Ангажманот на Европската комисија (ЕК) во Македонија започна пред повеќе од една година и е од огромна важност и за земјата и за ЕК. Нема сомнение дека нереализирањето на договорот ќе има негативни последици. Тешко е отсега да се каже какви ќе бидат последиците но пријателскиот тон на ЕК кон Македонија сосема сигурно ќе се смени“, изјави за НОВА европски дипломат во Брисел.