Последниот, актуелен состав на Антикорупциската комисија под водство на Љубинка Корабоска е најлошиот состав досега, може да се заклучи од експертската анализа на “Институтот за демократија Социетас Цивилис”. Без ниту една иницијатива за корупција на високо и врвно ниво, и со мала видливост во јавноста, вака експертскиот тим кој работел на ова истражување ја оценува работата на актуелниот состав.
За најдобар состав досега е оценет првиот состав на Антикорупциската комисија, во кој членови беа и претседателката на Транспаренси Интернешнл – Македонија, Слаѓана Тасева, како и поранешниот министер за правда, Михајло Маневски. Функционирал со најмалку пари и луѓе, но, успеал и покрај сите пречки, од новоформираното тело во 2002 да ја етаблира и да и даде гласност на институцијата.
Вториот состав, пак, е оценет како состав со помало професионално искуство, но, се потенцираат и забелешките од Европската комисија која составот го цени за пристрасен и политички мотивиран. Првиот состав имал и најмногу иницијативи за корупција на високо ниво, вториот имал само една таква иницијатива, а третиот состав нема ниту една.
Заклучоците од истражувањето се дека досието на Антикорупциската комисија покажува дека комисијата не е независна, но и дека нема храброст и лидерство за да ја контролира Владата.
Последниот, трет, состав на Антикорупциската се бираше во 2011 година. Тогаш, во отсуство на опозицијата, се реизбраа повеќе од старите членови, меѓу кои и Мирјана Димовска, а за нов член и претседател беше назначена Љубинка Коробовска, жената чиј професионален бекграунд предизвика многу контроверзи. Па така, наместо правник или економист, како што предвидува законот, менаџерот по туризам со 15 реда биографија седна на претседателската фотеља на Антикорупциската. Контроверен беше и изборот на членот Љубинка Љубинка Муратовска-Маркова, баба на портпаролот на МВР Иво Котевски и мајка на апелациската судијка Маја Маркова – Котевска.
Ревизорските извештаи, наодите на ревизорите за Скопје 2014, финансиските извештаи за партиите, ревизорските извештаи за дупките во правдањетпо ан трошењето на парите од страна на институциите, финансирањето на кампањите, минусот на ВМРО ДПМНЕ од три милиона евра во завршната сметка од претходните избори и други актуелности од областа на корупцијата ниту еднаш не се најдоа на дневен ред на работата на ова тело.
Последната одлука на комисијата да и дава амин на Владата за вработувања во предизборниот период надвор од својот мандат, уште еднаш, според експертите, го потврди недостатокот од интегритет, професионалност и транспарентност. Повеќето експерти за Нова оваа одлука ја оценија како “дејствување без преседан” и во функција на власта.