Антикорупциската комисија денеска прифати три приговори поднесени од ВМРО ДПМНЕ за прекршување на изборниот законик и еден приговор отфрли како неоснован.
Антикорупциската комисија ќе поднесе прекрошна пријава против раководните лица во Агенцијата за финаниска подршка на земјоделскиот и руралниот развој затоа што исплатила 7,5 милиони денари на повеќе од 2000 лозари за откуп на винското грозје за 2014, 2015 и за 2016 година.
Овој долг винариите „Повардарие“ и „Стефанс“ не можеле да го исплатат затоа што отишле во стечај, но сепак Антикорупционерите утврдија дека не се работи за редовни исплати и одлучија дека со исплатата е прекршен изборниот законик и законот за спречување на корупција и дека ќе иницираат постапка за утврдување одговорност пред надлежните органи.
Антикорупциската комисија одлучи да поднесе прекрошна пријава и против градоначалниците на Гази Баба и на Штип.
Делумно беше прифатен приговорот поднесен од ВМРО ДПМНЕ кој се однесуваше за општината Гази Баба. Во време кога биле распишани изборите, општината распишала јавен оглас за ангажирање на агенција за обезбедување која физички и партолно ќе ги обезбедува сите 11 училишта во општината и двете градинки, на сметка на општината, наместо оваа обврска да ја плаќаат родителите. Антикорупциската утврди дека иако во годишниот план на општината биле издвоени пари за оваа намена, сепак спорно е соопштението објавено за настанот од страна на општината кое потоа било објавено во неколку медиуми, за што и ќе се иницира прекршочната постапка.
Прекршочната постапка ќе се покрене и против градоначалникот на Штип а во врска со дистрибуција на дрва за огрев на две социјално загрозени семејства и на Ј.П „Исар“, откако изборите веќе биле распишани.
Приговорот што ВМРО ДПМНЕ го поднел за вработување на десет лица во ЈП Комуна во Ново Село е отфрлен како неоснован. Јавното претпријатие не објавило оглас за вработување на неопределно време, туку преку Агенцијата за вработување, ден пред да се распишат изборите поради итни работи привремено биле ангажирани десет работници.
ДКСК по сопствена иницијатива отвори и постапка за утврдување на фактичката состојба во однос на соопштението објавено на веб страницата на Министерството за земјоделство, шумарство и водостопанство на 14-ти април дека се исплатени 27 милиони евра на 26.776 тутунопроизводители за реколтата од 2018 година.
Ќе се утврдува и точноста на информацијата објавена во некои медиуми дека раководителот на одделението за хортикултура Јово Темелковски во ЈП „Водовод и канализации“ на 16-ти април се појавил на работа со маица од претседателскиот кандидат Стево Пендаровски.